मुंबई : आयपीएलमधील मुंबई इंडियन्स संघाच्या मालकीण आणि उद्योगपती मुकेश अंबानी यांच्या पत्नी नीता अंबानी यांच्या शिरपेचात मानाचा तुरा खोवला गेला आहे. कारण जगातील सर्वोत्तम दहा प्रभावी महिलांमध्ये नीता अंबानी यांचा समावेश करण्यात आला आहे.
मुंबई इंडियन्स संघाची मालकी नीता यांच्याकडे आहे. गेल्या काही वर्षामध्ये मुंबई इंडियन्सने दमदार कामगिरी केली आहे. त्याचबरोबर आयपीएलमध्ये सर्वाधिक जास्त जेतेपदे मुंबई इंडियन्सकडे आहेत. नीता अंबानी या फक्त क्रिकेटशी निगडित आहेत असे नाही, तर फुटबॉलमध्येही जागतिक स्तरावर त्यांचे योगदान आहे. आता तर जगातील सर्वोत्तम दहा प्रभावी महिलांमध्ये नीता अंबानी यांचे नाव सामील करण्यात आले आहे.
याबाबत स्पोर्ट्स बिझनेस नेटवर्कने म्हटले आहे की, नीता अंबानी या मुंबई इंडियन्स संघाच्या मालकीण आहेत. आयपीएलच्या इतिहासामध्ये अंबानी यांच्या मुंबई इंडियन्स संघाने आतापर्यंत नेत्रदीपक कामगिरी केली आहे. आयपीएलमधील मुंबई इंडियन्सची कामगिरी ऐतिहासिक अशीच आहे. नीता अंबानी या फक्त क्रिकेट आणि आयपीएलपुरत्या मयार्दित नाहीत तर राष्ट्रीय आणि आंतरराष्ट्रीय स्तरावरही त्यांनी अन्य खेळाडूंसाठी भरीव योगदान दिले आहे. त्यामुळेच नीता अंबानी यांचा हा बहुमान करण्यात आला आहे.
आयपीएलच्या पहिल्या पर्वात नीता अंबानी यांचा मुंबई इंडियन्समध्ये सक्रिय सहभाग नसल्याचे पाहायला मिळाल्याचे चाहत्यांचे म्हणणे आहे. पण दुस-या पर्वापासून नीता अंबानी या आयपीएल आणि मुंबई इंडियन्समध्ये चांगल्या सक्रिय झाल्याचे पाहायला मिळाले. नीता अंबानी या मुंबईचा सामना सुरू असताना ब-याचदा डग आऊटमध्येही पाहायला मिळाल्या आहेत. त्याचबरोबर मुंबई इंडियन्सच्या खेळाडूंबरोबर त्या चर्चा करत असल्याचेही पाहायला मिळाले आहे.
जगभरातील प्रभावी महिलांच्या यादीमध्ये क्रीडा विभागही आहे. या क्रीडा विभागाच्या यादीमध्ये अमेरिकेची अव्वल महिला टेनिसपटू सेरेना विल्यम्सचा समावेश करण्यात आला आहे. त्याचबरोबर जगप्रसिद्ध जिम्नॅस्ट सिमोनी बाईल्सचेही नाव आहे. या यादीमध्ये भारताची महिला टेनिसपटू सानिया मिर्झा आणि भारताची माजी कर्णधार मिताली राज यांचाही समावेश करण्यात आलेला आहे.
(PRAHAAR)