തിരുവനന്തപുരം : വിഷ്ണുവും പ്രകാശന് തമ്പിയും ചേര്ന്ന് 200 കിലോയിലേറെ സ്വര്ണം കടത്തിയതായി റവന്യൂ ഇന്റലിജന്സിന്റെ കണ്ടെത്തല്. എന്നാല് ബാലഭാസ്കര് ജീവിച്ചിരുന്ന സമയത്ത് ഇരുവരും സ്വര്ണം കടത്തിയതിന് തെളിവില്ലെന്നും ഡിആര്ഐ അറിയിച്ചു. സ്വര്ണക്കടത്തിന് സഹായിച്ചിരുന്ന കസ്റ്റംസ് സൂപ്രണ്ടിനെ പ്രകാശന് തമ്പി പരിചയപ്പെട്ടതു ബാലഭാസ്കറിന്റെ പേര് പറഞ്ഞാണെന്നും മൊഴി ലഭിച്ചു.
ഇതിലൂടെ ബാലഭാസ്കറിന്റെ സുഹൃത്തുക്കളും ട്രൂപ്പ് അംഗങ്ങളുമായിരുന്ന പ്രകാശന് തമ്പിയും വിഷ്ണു സോമസുന്ദരവും തിരുവനന്തപുരം കേന്ദ്രീകരിച്ചുള്ള സ്വര്ണക്കടത്തിലെ മുഖ്യകണ്ണികളെന്ന് ഉറപ്പിക്കുകയാണു ഡിആര്ഐ. പ്രകാശന് തമ്പിക്കു പിന്നാലെ കഴിഞ്ഞ ദിവസം കീഴടങ്ങിയ വിഷ്ണുവിനെയും ചോദ്യം ചെയ്തതോടെ നിര്ണായക വിവരങ്ങള് ലഭിച്ചെന്നാണ് അവർ അവകാശപ്പെടുന്നത്. നവംബര് മുതല് മേയ് വരെയുള്ള ഏഴു മാസങ്ങളിലായി പ്രകാശന് തമ്പി ഏഴു തവണയും വിഷ്ണു 10 തവണയും ദുബായിലേക്കു യാത്ര ചെയ്തു. സ്വര്ണക്കടത്തിലെ കാരിയറായി കണ്ടെത്തിയിട്ടുള്ളവരും ഇതേദിവസങ്ങളില് യാത്ര ചെയ്തിട്ടുണ്ട്.ഇത്രയും യാത്രകളിലായി പ്രകാശന് തമ്പി 60 കിലോയും വിഷ്ണു 150 കിലോയും സ്വര്ണം കടത്തിയെന്നാണു നിഗമനം.
(ANWESHANAM)